BUKAS ang Food and Drug Administration (FDA) na tulungan ang mga nagsusulong sa paggamit ng ivermectin kontra COVID-19 na maisama ang nasabing gamot sa drug emergency use.
Sa pagdinig ngayong araw sa Kamara, sinabi ni FDA Director General Eric Domingo, na kanilang tutugunan ang hiling ng mga kongresista na maisama ang nasabing gamot sa COVID protocol.
Bukod sa ivermectin, pinasasali rin sa DEU ang gamot na Leronlimab.
Kapwa ang ivermectin at leronlimab ay suportado ng mga pribadong doktor upang hindi lumala ang epekto ng virus sa katawan ng tao.
Kapag nasali ang dalawang gamot sa COVID protocol, mas madali nang makakuha ng Emergency Use Authorization para sa nasabing mga gamot.
Isa pang ospital, binigyan ng compassionate special permit
Isa pang ospital ang binigyan ng compassionate special permit (CSP) para gamitin ang anti-parasitic drug ivermectin laban sa COVID-19.
Ito ang inanunsyo ni Food and Drug Administration (FDA) Director General Eric Domingo sa pagdinig sa Kamara.
Ito na ang ikatlong hospital na nakakuha ng CSP.
Sinabi ni Domingo na isa pang aplikasyon ang nakabinbin pa.
Matatandaan na ipinag-utos ni Pangulong Rodrigo Roa Duterte ang pagsasagawa ng Pilipinas ng sariling clinical trials sa ivermectin bilang gamot sa COVID-19.
Ayon kay Domingo, ipag-utos mismo ng Pangulo sa Department of Science and Technology at sa Department of Health ang pagsasagawa ng clinical trials.
Ito aniya ay dahil marami naririnig at nababalitan ang Pangulo na sumusuporta dito at meron din siyentipiko na kulang pa ang ebidensya.
(BASAHIN: Panghuhuli sa nagbebenta at gumagamit ng Ivermectin, i-uurong muna)
